Manuel Noriega, lindi në një familje të varfër në Panama. Karriera e tij në ushtri pësoi një ngjitje nën presidentin Omar Torrijos, që e emëroi shef të shërbimit sekret të ushtrisë. Ai ekzekutoi rivalët politikë të qeverisë, dhe nisi të merret me trafikun e drogës. Njëherazi, ishte një informator i CIA-s, mbi aktivitetet e lëvizjeve komuniste në rajon.
Kjo ishte edhe arsyeja e tolerimit të gjatë të veprimeve të tij anti-ligjore. Pas vitit 1981 kur Torrijo vdiq në një aksident ajror, Noriega, u bë udhëheqësi absolut i vendit. Nga ai moment, nisi të ndihmonte lordët e drogës kolumbiane, si Pablo Eskobar, që të trafikonin kokainë në Shtetet e Bashkuara, dhe të pastronin paratë e drogës nëpërmjet bankave të Panamasë, duke fituar në këmbim miliona dollarë.
Sërish SHBA-të, e toleruan sjellet e tij, për shkak se Panamaja shihej si një shtet tampon, kundër rebelimeve majtiste në Amerikën Qendrore, gjatë Luftës së Ftohtë. Qasja ndryshoi në vitin 1985, kur Noriega rrëzoi Nikolas Barleta, presidentin e parë të Panamasë, të zgjedhur në mënyrë demokratike.
Tre vite më vonë, Noriega u akuzua për trafik kokaine dhe pastrim parash. Kongresi Amerikan, vendosi sanksione ekonomike. Noriega refuzoi të tërhiqej, ndaj më 20 dhjetor 1989, 28 mijë trupa amerikane sulmuan dhe pushtuan vendin e vogël. Brenda disa ditësh ata arrestuan Noriegën, që u dënua me 40 vite burg në SHBA. Ai u rikthye në vend në vitin 2011, sërish në burg për krime të tjera. Vdiq në majin e vitit 2017.
TIRANA TODAY
