E shkuara është përdorur shpesh si një mjet në betejën e egër politike në Shqipëri. Në jo pak raste nuk kanë munguar as spekulimet, por një gjë është e qartë: Njerëz me precedentë të rëndë penalë, gjenden gjithnjë rrotull politikanëve.
Ata shfrytëzohen në fushata, në organizime tubimesh, për paratë e tyre. Por edhe këta të fundit, i përdorin “fotot e rastit” me politikanët, si ”licenca” që u hapin shumë dyer, apo që i mbrojnë nga drejtësia.
Lulzim Basha akuzoi Taulant Ballën për lidhje me 3.4 milionë eurot e sekuestruara në portin e Durrësit. Dje Balla publikoi një foto të Bashës, me njërin nga pronarët e makinës ku u gjet shuma e madhe e parave.
Ndoshta lideri demokrat nuk i njihte personalisht, por ka pozuar me ta si mbështetës të PD. Si shumë çështje të tjera edhe kjo do të duhet të verifikohet nga organet kompetente.
Fakt është se askush nuk është aq i pasur sa të blejë të shkuarën e vet, edhe politikanët. Berisha pretendon se është anti-komunisti me i madh në këtë vend, por fotoja e tij me djemtë e Enver Hoxhës e përgënjeshtron këtë.
Rama dhe ministrat e tij, kanë dalë shpesh në foto me personazhe, që kanë rezultuar të dënuar jashtë vendit për veprat të rënda penale. Sigurisht një foto, filmim apo përgjim, nuk të implikon automatikisht në ndonjë krim. Por ato janë dëshmi se politikanët shqiptarë, janë shumë më tepër “babaxhanë” me “militantët” me të shkuar të errët.
Ata kanë para, ndikim në zona të caktuara, kjo përkthehet në vota, dhe vota në pushtet. Ndërkohë demokratët apo socialistët e varfër janë naivë në mbështetjen e tyre, zhgënjehen shpejt dhe e braktisin politikanin.
TIRANA TODAY
