Ish-deputetja e PD-së, Albana Vokshi, ka postuar një video në rrjetet sociale, ku shihet një qytetar që kërkon termometër për djalin e tij. Ai dëgjohet në një moment duke thënë: “As termometër nuk keni? Ju jeni masakër fare!”. Pamjet janë marrë nga pediatria e kryeqytetit.
Qytetari që i shkruan Albana Vokshit, e vë në dijeni se situata është tejet kaotike, kjo për shkak të radhëve të gjata. Qytetari shprehet se janë në pritje shumë njerëz, duke bërë që situata të dalë jashtë kontrollit.
“Një video sa 1000 fjalë!
“As termometër nuk keni?”. Kjo është pyetja e një prindi të dëshpëruar, fëmija e të cilit është sëmurë, por spitali nuk është i aftë të përballojë dot një fluks normal në pediatri.
Video dhe fotot që provojnë rradhën, ku 100 fëmijë presin të vizitohen në kushte jo normale, rrëzojnë propagandën e Edi Ramës, i cili po sorollatet nëpër spitale, i ndjekur vetëm nga ERTV-ja e tij personale, ndërsa mediat nuk lejohen të verifikojnë asgjë.
Por propaganda e Ramës nuk ndihmon dot fëmijët e sëmurë, që gjejnë në spital një realitet krejt tjetër.
Ky është momenti që Ministrja e Shëndetësisë të mos bëjë ciceronen e propagandës, por të marrë masa urgjente për të normalizuar siuatën në pediatri.
Fëmijët nuk kanë pse paguajnë për propagandën e pështirë të Edi Ramës!”, shkruan Albana Vokshi, bashkëngjitur videos në fjalë.
