“Air Albania”, kompania e parë ajrore shqiptare, do të nisë fluturimet për herë të parë. Destinacioni i parë i saj është linja Tiranë-Stamboll-Tiranë.
Avioni Airbus 319, që si stemë ka flamurin shqiptar, është ulur në aeroportin “Nënë Tereza” të Rinasit, ku po zhvillohet dhe një ceremoni inaguruese. I pranishëm në këtë ceremoni është edhe kryeministri Edi Rama, si dhe përfaqësues të kompanive partnere.
Gjatë fjalës së tij, kreu i qeverisë Rama u shpreh se:
““Është një emocion tejet i veçantë për mua, por jo vetëm për mua që sot mes miqsh, bashkëpunëtorësh dhe partnerësh, përmbushim jo thjesht një zotim, por një ëndërr të kahershme, e cila dukej e pamundur për vite të tëra, kompaninë ajrore të flamurit kuqezi. Është një ëndërr që sot merr krahë për të filluar një fluturim që do të jetë i gjatë. Por synimi ynë është që t’i çojë shqiptarët sa më larg dhe t’i ndërlidh ata sa më shumë. “Air Albania” është një vepër kuqezi, kombëtare, një fryt i arrirë në këtë që për ne është viti i Gjergj Kastriotit. “Air Albania” do të ishte ose s’do të ishte, por ideja për ta kthye në liri për shqiptarët dhe mundësi reale që ata ta kenë këtë kompani zgjedhjen e tyre të parë, mbetet ambicia jonë. Tashmë kemi nisur rrugën e një epoke të re. Sot falë Air Albania ne fluturojmë, por mund të fluturojmë. Ne duhet të fluturojmë me këmbë në tokë. Bëhet fjalë për një fluturim të qëndrueshëm dhe të vazhdueshëm”.
Fluturimet e para do të jenë drejt Stambollit, ndërsa “Air Albania” do të ketë destinacione të tjera në qytetet kryesore evropiane si Roma, Londra apo Milano.
Nesër fluturimi i parë
Air Albania ka arritur që të finalizojë paketën e parë të fluturimeve, duke bërë që për herë të parë një firmë me kapital shqiptar, privat dhe publik të ofrojë shërbime në fushën e fluturimeve (në pronësi të Turkish Airlines, 49%, kompanisë shtetërore të kontrollit ajror Albcontroll 10% dhe të kompanisë së themeluar në Vlorë MDN Investment në masën 41%). Nesër pritet të kryhet fluturimi i parë testues drejt Turqisë.
Udhëtimet e para do të jenë drejt Stambollit, ndërsa në muajin Tetor, Air Albania do të ketë destinacione të tjera në qytetet kryesore europiane.
Roma, Londra, Milano do të jetë pjesë e fluturimeve të saj, ndërsa do të pasohet nga një program më i plotë muajt e ardhshëm me Athinën, Mynihun dhe Barcelonën.
Por përveç linjave europiane, Air Albania do të ofrojë edhe destinacione ndërkombëtare, ku për herë të parë do të ketë një linjë direkte Tiranë-New York. Pritet që biletat të ulen me hyrjen e kësaj kompanie.
Kompania do të udhëtojë me një flotë të re avionësh, jo më të madhe se 10 vjet, kur mosha mesatare e avionëve që udhëtojnë në Shqipëri është 18.5 vjeçare. Avioni i parë është një Airbus 319. Ai do të mbajë ngjyrat e flamurit shqiptar dhe shqiponjën dy krenare.
