Teksa protesta e banorëve të Astirit gjeti përkrahjen e opozitës, nga ana tjetër janë studentët të cilët kërkojnë që klasa politike të tërhiqet.
Disa prej studentëve që kanë marrë megafonin në protestën përpara Ministrisë së Arsimit, kanë ngritur shqetësimin për tentativat që po bëhen nga grupe të caktuara politike dhe jo-politike, për të ndërhyrë në këtë organizim.
Një prej studentëve ka apeluar: “Të qërohen prej këtej të gjitha partitë politike”. “Kjo është protesta jonë, çdo shoqatë tjetër dhe parti nuk duhet të flasë këtu për hallet e tyre”, tha një tjetër student.
Ndryshe nga dje, protesta është përhapur edhe në Universitetin e Durrësit, Korçës dhe Elbasanit. Mijëra studentë bllokuan akset kryesore në Tiranë, teksa marshonin drejt Universitetit të Tiranës.
Disa studentë kanë hedhur vezë dhe letra higjienike drejt Ministrisë. Me thirrjet “Ne nuk jemi bankomat”, “S’ka më heshtje, s’ka më pritje”, studentët kërkojnë përgjysmim të tarifave dhe heqjen e tarifave shtesë për provimet e mbartura. Studentët thonë se do ta vijojnë protestën e tyre, dhe nuk do të dorëzohen deri sa të plotësohen kërkesat e tyre.
Këshillat Studentore të Universiteteve Publike i janë drejtuar me një kërkesë Ministrisë së Arsimit dhe Sportit, ku paraqesin 4 kushtet e tyre. Ata i kanë lënë afat Ministrisë së Arsimit deri në orën 16:00, që të kthejnë përgjigje për kërkesat e tyre.
