Debati i kohëve të fundit të gjyqtarëve dhe prokurorëve të korruptuar është një provë e madhe e procesit të Reformës në Drejtësi. A po minohet besimi tek drejtësia? Nga të djathtët vjen një denoncim, ku përmes Enkelejd Alibeaj, fokusi vihet sërish tek pushteti i kryeministrit Rama.
Vettingu mbetet shpata që ‘pret’ kokat e drejtësisë, por Alibeaj ndalet në një emër, që ka kaluar Vettingun. Ilir Toska, Gjyqtar i Gjykatës së Apelit në Tiranë, kaloi Vettingun në muajin qershor, ndonëse DSIK kishte dorëzuar pranë Komisionit të Pavarur të Kualifikimit një raport, që e cilësonte si të papërshtatshëm këtë gjyqtar, për të vijuar karrierën në drejtësi.
Deputeti demokrat e ka cilësuar këtë si një farsë të orkestruar nga Edi Rama, për të kapur sistemin e drejtësisë, ndërsa solli rastin e një gjyqtari të papërshtatshëm, sipas Alibeajt, që kaloi Vettingun me urdhër të kryeministrit.
“Meqë qeveria hesht për vendimet arbitrare të komisionit të Vettingut, Partia Demokratike po sjell sot një denoncim, se si ky organ po minon procesin, për të vënë drejtësinë në duart e Edi Ramës.
Ilir Toska, Gjyqtar i Gjykatës së Apelit në Tiranë, kaloi Vettingun në muajin qershor, ndonëse DSIK kishte dorëzuar pranë Komisionit të Pavarur të Kualifikimit një raport, që e cilësonte si të papërshtatshëm këtë gjyqtar, për të vijuar karrierën në drejtësi.
Sipas raportit të DSIK, Toska ka marrë para në prani të një zyrtari të Ministrisë së Brendshme, për të mos dhënë një masë disiplinore ndaj një gjyqtari. Gjithsesi, Ilir Toska e kaloi me sukses Vettingun, pasi është kandidat i Edi Ramës, për Këshillin e Lartë Gjyqësor”, deklaroi Alibeaj.
Gjyqtari Ilir Toska kalon Vettingun
Gjyqtari i Gjykatës së Apelit Tiranë, Ilir Toska, është konfirmuar në detyrë, duke kaluar me sukses Vettingun. KPK dha vendimin pozitiv për gjyqtarin Toska, edhe pse Drejtoria për Sigurimin e Informacionit pranë Kryeministrisë kërkoi shkarkimin e tij, për kontakte të papërshtatshme me botën e krimit.
Kjo ishte hera e parë në gjithë procesin e Vettingut, që DSIK kërkonte shkarkimin e një gjyqtari, pasi deri më tani njerëzit e drejtësisë janë ‘djegur’ vetëm nga pasuria, pasi siç dihet, tri shtyllat kryesore të Vettingut janë pasuria, pastërtia e figurës dhe aftësitë profesionale.
Pasuria e gjyqtarit Ilir Toska
Gjyqtari posedon vetëm dy pasuri të paluajtshme, konkretisht një apartament me sipërfaqe 91.44 m2, me vlerë 50 292 euro, blerë me kursime, hua dhe me një kredi bankare si dhe 33% të një apartamenti banimi me sipërfaqe 68 m2, në vlerën 25 000 lekë. Në deklaratën fillestare, gjyqtari deklaron edhe 2 600 000 lekë para cash.
