Opozita kërkon nga kryeministri Rama që të votojë ligjin për Vettingun për politikanët, të cilin PD e depozitoi sot në Kuvend. Është deputeti demokrat, Oerd Bylykbashi, i cili në studion e lajmeve të “Ora News” tha se Rama duhet të fillojë të mos përdridhet, por vetëm të thotë “po”, për ta votuar.
Do të ketë Vetting për Presidentin?
“Të gjithë institucionet kushtetuese janë të përfshira në këtë propozim që bëjmë ne. Shkëputja e krimit nga politika, pra të heqim krimin nga politika dhe institucionet është objektivi primar. PD dhe opozita kanë shprehur haptas një objetiv dhe vullnet, të shkëpusë lidhjet e politikës dhe institucioneve me krimin.
Edi Rama duhet të fillojë të mos përdridhet, duhet ta ndërpresë përdredhjen. Duhet të thotë “po”, ne e votojmë dhe nuk bëjmë zë, sepse atë që votuan para dy vitesh, atë do të votojë përsëri”.
Bylykbashi tha se nuk është kontaktuar nga asnjë eksponent i PS, ndërsa mbajti të njëjtin qëndrim me Bashën, kur tha se nuk kanë çfarë të negociojnë në lidhje me këtë çështje.
Jeni kontaktuar nga eksponentë të PS? Ka tre të ngarkuar nga kryeministri.
“Jo, por kjo nuk ka pikë rëndësie. Problemi i tij kë ka ngarkuar dhe çbëjnë ata. Kjo nuk ka rëndësi. Basha ishte i qartë, nuk ka hapësirë dhe nuk ka nevojë për negociata. Në aspektin teknik ky është një tekst, i cili është dakordësuar sot në Kushtetutë, ka marrë 140 vota nga deputetët, është çertifikuar nga Komisioni i Venecias dhe po zbatohet sot për një nga degët e pushtetit, e zbatojmë edhe tek dy degët e tjera”.
