Vettel sërish në pole, Mercedes i “sulet” nga pas

Sebastian Vettel po tregon një formë të lartë këtë sezon dhe ka siguruar sot “pole position” në pistën e Baku, në garën e 4-t sezonale të Formula 1, atë të Çmimit të Madh të Azerbajxhanit, e cila do të zhvillohet nesër (starti ora 14:10).Ky është “pole” i tretë radhazi për Vettel, që po bën një paraqitje të shkëlqyer me Ferrarin e tij këtë sezon. Një paraqitje e shkëlqyer e pilotit gjerman të “kokëkuqes”, që pas një të premte zhgënjyese, sot bëri një xhiro perfekte, duke dhënë kohën 1’41”498. Në vendin e dytë u rendit Lewis Hamilton me Mercedes, duke e nisur garën nga vija e parë e startit, në krah të Vettel, ndërsa i treti u rendit Valtteri Bottas (Mercedes).Në vendet 4-5 u klasifikuan dy makinat Red Bull, me Daniel Ricciardo që ishte më i shpejtë se shoku i tij i skuadrës Max Verstappen. Ata kanë pas makinën tjetër Ferrari, atë të Kimi Raikkonen, i gjashti edhe pse ishte më i shpejti në dy sesionet e mëparshme, por gaboi në xhiron e fundit. Renditja e “Top 10” makinave më të shpejta sot kompletohet me Ocon (Force India), Perez (Force India), Hulkenberg (Renault) dhe Sainz (Renault).