Ish-kryetari i Kuvendit të Kosovës dhe PDK-së, Kadri Veseli, ka dalë në sallën e gjyqit të Dhomave të Specializuara të Kosovës në Hagë.
Veseli tha se është i pafajshëm për të 10 akuzat që rëndojnë ndaj tij.
“Faleminderit i nderuar gjykatës. I dëgjova dhe i kam lexuar të gjitha pikat e aktakuzës. Më lejoni të deklarohem me bindje të plotë se jam i pafajshëm në të gjitha pikat e aktakuzës”, u shpreh ish-kryeparlamentari i Kosovës.
Aktakuza kundër Kadri Veselit u konfirmua më 26 tetor 2020. Ai u arrestua nga Zyra e Prokurorit të Specializuar më 5 nëntor 2020, dhe u transferua në objektin e paraburgimit të Dhomave të Specializuara të Kosovës (DHSK) në Hagë, në të njëjtën ditë.
Aktakuza e ngarkon Kadri Veselin me akuza për krime lufte dhe krime kundër njerëzimit, sipas të drejtës ndërkombëtare, për forma të ndryshme të përgjegjësisë penale.
