Serbia ka arritur të marrë një fitore të artë përballë Kosta Rikës, me rezultatin e ngushtë 1-0 falë supergolit të Kolarov. Ballkanasit e dominuan ndeshjen që nga minuta e parë dhe merituan ndoshta më shumë se një gol, por Mitrovic nuk ia del në asnjë rast të mposhtë Keylor Navasin. Lojtari që ra më tepër në sy ishte pikërisht Milinkovic-Savic, fantazisti që aktualisht kërkohet nga shumë klube evropiane dhe ka një vlerë rreth 150 milionë euro.
Ai shpërdoron një rast të pastër në minutat e para, ndërsa më pas provon të shënojë me roveshatë, por Navas tregon aftësitë e ti dhe neutralizon topin. Në pjesën e dytë vjen edhe goli i parë, është Kolarov që shënon një perlë me goditje dënimi nga distanca.
Mbrojtësi i Roma-s lëshon një predhë nga rreth 30 metra, me topin që shkon në trekëndëshin e djathtë i pakapshëm për Navas. Kosta Rika nuk kishte fuqinë të reagonte teksa ballkanasit ishin në kontroll të ndeshjes edhe pas golit të avantazhit dhe me pak fat mund të kishin dyfishuar rezultatin.
Në fundin e takimit ndeshja tensionohet dhe Kosta Rika kërkon golin e barazimit. Matic përplaset me një nga zyrtarët e kampit kundërshtarë dhe përfshihet në një sherr masiv.
