Një nga vëllezërit e afrikano-amerikanit George Floyd, i cili ka vdekur gjatë arrestimit nga policia në Mineapolis të Shteteve të Bashkuara, kërkoi nga Kongresi amerikan që “të ndalojë dhimbjen” e njerëzve me ngjyrë, të shkaktuar nga dhuna e policisë.
Vdekja e Floydit më 25 Maj ka shkaktuar protesta globale kundër racizmit dhe brutalitetit të policisë.
Philonise Floyd foli të mërkurën para Komitetit për Drejtësi të Dhomës së Përfaqësuesve të SHBA-së.
“Jam këtu për t’ju kërkuar që ta ndaloni. Ndaloni dhimbjen”, tha Philonise Floyd.
“George ka kërkuar ndihmë dhe është injoruar. Ju lutem dëgjojeni thirrjen që po e bëj tani, thirrjen e familjes sonë dhe thirrjet nga rrugët e botës”, tha ai.
George Floyd është ndaluar nga policia nën dyshimet se ka krijuar një faturë të rreme në vlerë prej 20 dollarësh.
Ai ka vdekur pasi një oficer i bardhë i policisë e ka shtypur me gju në pjesën e prapme të kokës.
Incidenti është filmuar nga kalimtarët dhe është shpërndarë në internet.
Këtë javë, kryetari i Komitetit për Drejtësi i Dhomës së Përfaqësuesve, Jerrold Nadler, ka thënë se “për çdo incident nga forca e tepërt që përbën tituj, e vërteta e shëmtuar është se ka të tjerë të panumërt për të cilët nuk dëgjojmë kurrë.”
“Ky është një problem sistematik që kërkon një zgjidhje gjithëpërfshirëse”, ka thënë ai. /Rel
