Kryebashkiaku i Tiranës, Erion Veliaj tha sonte se kryetarja e LSI-së, Monika Kryemadhi nuk e mban fjalën si bashkëshorti i saj Ilir Meta. I ftuar në emisionin “Top Story”, Veliaj ka bërë edhe dallimin mes LSI-së që drejton tani Monika Kryemadhi dhe asaj që Meta. Sipas tij, Meta ishte një njeri që i qëndronte fjalës, ndryshe nga bashkëshortja e tij.
” Në qoftë se Ilir Meta thoshte “po është po”, në qoftë se thoshte “jo është jo” dhe qëndronte “Po”-ja dhe “Jo”-ja siç ishin thënë në fillim. Ndërkohë fatkeqësisht nuk ka vazhduar kështu dhe me Kryemadhin” – u shpreh Veliaj.
Gjithashtu, Veliaj foli për votimin e buxhetit edhe me votat e Lëvizjes Socialiste për Integrim, u shpreh se ky qëndrim ishte për Bashkinë e Tiranës dhe jo për kryetarin.
“Në mbledhjet e para ne e kishim të koordinuar që pavarësisht se çfarë ndodh në politikën e madhe, Tiranës do t’i japim mbështetje. Ajo që ishte habi ishte mosdhënia e votës dhe jo dhënia e votës nga 1,2,3 dhe tani 4 këshilltarë. “ – u shpreh Veliaj.
Veliaj ka folur edhe për zgjedhjet e ardhshme për kryetar të Bashkisë së Tiranës, duke deklaruar se koalicionin e ri opozitar do ta ketë përballë.
“Ca gjëra duhen thënë thjesht, por unë naiv nuk jam. Pra unë nuk pres apo nuk e gënjej veten me iluzionin se partitë që shfrytëzonin çdo moment dhe çdo cedim të vogël në Këshill Bashkiak për të më rrëzuar do t’i kem përkrah në fushatë. Unë këtë e kuptoj. Kështu që jam i përgatitur të shkoj në një fushatë me koalicionin opozitar përballë dhe sa të kem unë fuqi, sa të kem unë energji dhe sa të kem unë vendimmarrje, fryma e fushatës sonë do të jetë vetëm pozitive për qytetin.” – u shpreh më tej Veliaj.
