Kryebashkiaku i Tiranës, Erion Veliaj, i është përgjigjur akuzave të Partisë Demokratike, lidhur me hapjen e kazinove në Tiranë.
Në një intervistë për Abc News, Veliaj tha se ky vendim i qeverisë është koherent, pasi lidhet me hotelet me pesë yje që janë në qendër të Tiranës dhe jo me pikat e basteve.
“Hotelet me pesë yje që janë në qendër të Tiranës korrespondojnë me këtë vijë dhe hartë. Përsa kohë janë taksapaguesit më të mëdhenj dhe nuk lejohen periferiket në çdo cep pallati, më duket diçka koherente për hotelet me pesë yje, vetëm në qendër dhe përsa kohë numri i turistëve dhe taksapaguesve është në këtë qendër. Nuk shoh devijim nga fushata për të ndaluar pikat e basteve poshtë çdo pallati dhe shkalle dhe merrnin kursimet modeste të familjeve.
Një nga arsyet pse njerëzit shkojnë në Las Vegas, nuk është peizazhi, por kazinotë. Nëse ka një komunitet që nuk futet në lagje, por qendër të Tiranës, janë të huajt, që janë gati shpenzojnë. Çdo i punësuar është një benefit. Nëse nuk do të ishte hoteli mbrapa meje (bashkisë), 300 të rinjtë që janë në punë do të ishin duke aplikuar për asistencë sociale” tha ai.
