Kryetari i Bashkisë së Tiranës ka udhëtuar në SHBA dhe ndodhet në Miçigan.
Në një vizitë dyditore, si i ftuar nderi nga “Grand Valley State University”, ku ka përfunduar edhe studimet ai do të mbajë një fjalim përpara 3 mijë studentëve në ditën e tyre të diplomimit.
Veliaj gjatë vizitës së tij zhvilloi një takim me homologen e tij, kryebashkiaken e qytetit të Grand Rapids, Rosalynn Bliss, me të cilën bisedoi për mundësitë e bashkëpunimit mes dy qyteteve dhe për shkëmbimin e eksperiencave të suksesshme.
Kryebashkiaku i Tiranës e njohu homologen e Bliss me nismën e Bashkisë së Tiranës për projektin strategjik të Pyllit Orbital. Po ashtu, Veliaj foli edhe për vëmendjen e veçantë që i është kushtuar përmirësimit të transportit publik, si dhe ndërtimit të korsive të dedikuara për biçikletat.
Veliaj u shpreh se Bashkia ka hartuar tashmë, edhe një masterplan të korsive të biçikletave për gjithë Tiranën, ku çdo investim i ri në infrastrukturë do të përmbajë edhe korsinë për biçikletat.
Veliaj i dha kryetares së Bashkisë së Grand Rapids, Rosalynn Bliss, Kullën e Sahatit të Tiranës, si një vlerësim për mikpritjen e shqiptarëve që jetojnë atje.
