Pa pasur frikë nga ndëshkimi i ligjit, Erion Veliaj përmbylli fazën e fundit të fushatës së hapur që bëri në mbështetje të Partisë Socialiste dhe kreut të saj, Edi Rama.
Veliaj ka zgjedhur tu drejtohet qytetarëve të Tiranës me një letër të personalizuar, me anë të së cilës, i fton ata të votojnë Edi Ramën dhe partinë që drejton, me argumentin se falë mbështetjes së tij, është bërë i mundur transformimi i Kryeqytetit.
Për të qenë më bindës në kërkesën për të marrë votën e kryeqytetasve, Veliaj rendit sukseset e punës dy vjeçare të bashkisë, si “Këndi i Lojërave te Liqeni, Pazari i Ri, Bulevardi i Ri, Parku Olimpik, Sheshi Skënderbej, etj, vepra të ndërtuara nga fillimi ose të rindërtuara.
Por ai premton për punë të mëdha edhe në pjesën e mbetur të mandatit, nëse Rama do marrë sërish besimin e shqiptarëve. “Me Edi Ramën kryeministër ne do të ndërtojmë 17 shkolla të reja, për t’i dhënë fund mësimit me dy turne; do të hapim Bulevardin e Ri në të gjithë gjatësinë e tij prej 1.7 kilometrash, duke sjellë zhvillim ekonomik dhe duke hapur mijëra vende të reja pune; do të përfundojmë Pyllin Orbital, i cili me mbi 2 milione pemë të mbjella do të jetë jo vetëm një park i jashtëzakonshëm për qytetarët, por edhe mushkëria e gjelbër e Tiranës; do të ndërtojmë Terminalin Perëndimor dhe Unazën e Madhe, duke i dhënë një zgjidhje të qëndrueshme dhe afatgjatë problemit të qarkullimit në Tiranë. Për të rinjtë do të transformojmë Piramidën në një qendër moderne kulturore, kurse për fëmijët do kemi edhe një Kopsht Zoologjik e Botanik, më të bukurin në rajon, e plot të tjera që presin mbështetjen e qeverisë”, thotë ai.
Veliaj lë topin në fushën e qytetarëve kur thotë se: “Që ta kemi këtë mbështetje sa më të madhe, kjo është në dorë të qytetarëve, të cilët në 25 Qershor do të votojnë jo vetëm për Shqipërinë që duam, por edhe për këto projekte të mëdha e për të ardhmen e Tiranës që duam”.
