Partia Socialiste po zhvillon një takim me banorët e Kasharit, ku ka marrë pjesë edhe kreu i Bashkisë së Tiranës, Erion Veliaj.
Ky i fundit foli për punët që ka bërë bashkia për qytetarët, sapo ai erdhi në pushtet, ndërsa vlerësoi edhe punën e bërë në bashki nga kryeministri Rama.
Gjithashtu, Veliaj bëri thirrje që qytetarët të votonin sërish Partinë Socialiste, ndërsa shtoi se kjo është alternativa më e mirë, pasi sipas tij “kundërshtarët vetëm shkatërrojnë”.
Megjithatë, teksa foli për ndryshimet e bëra në Bashkinë e Tiranës, pas fitores së tij, Veliaj tha se në ndryshim nga Lulzim Basha, ai riktheu shpërblimin e bebeve të sapolindura, një bonos prej 5 mijë lekësh të reja.
“Ka pas një traditë të mirë Edi Rama, mirëpriste cdo foshnje me një pagesë të vogël.
Kur rifituam bashkinë, ne e kthyem këtë shpërblim. Kemi rikonstrukturuar 30 çerdhe në Tiranë. Kemi bërë 36 kopshte në vetëm 1 vit e gjysmë. PS bënte shtet, qytet dhe ata tjerët vetëm e shkatërrojnë.
Qeveria shqiptare sapo aprovoi projektin e financimit në 30 shkolla të reja. Njerëzit mbas shkollës kërkojnë të vlerësohen. Njerëzit më thonin, në kohën e Edi Ramës, kush mbaronte me 10-a merrte një bursë. U ndërpre në 2011, ne e rikthyem bursën për të thënë që i vlerësojmë më të mirët.
Në 4 vite 220 mijë veta u punësuan, kjo parti bën shtet dhe prandaj PS duhet të jetë në krye të shtetit edhe për 4 vjet”, tha Veliaj ndër të tjera.
Megjithatë, kryebashkiaku duket se harroi problemet që kanë hasur prindërit e bebeve të sapolindura në vitet 2012, 2013, 2014 dhe deri në nëntor të 2-15-ës për marrjen e bonusit.
Kështu, fëmijët e lindur në këto vite, nuk kanë marrë pagesën e Bashkisë, sepse Veliaj ka dhënë shpërblimin vetëm për fëmijët e lindur gjatë mandatit të tij si kryebashkiak.
Kjo për shkak se vetë Bashkia e drejtuar nga Veliaj ka argumentuar se nuk mund të përfshijë në buxhetin aktual pagesa që duhet të ishin bërë vitet e shkuara, gjë që ka shkaktuar pakënaqësira tek familjet që kanë ngelur pa marrë shpërblimin që u takonte.
