Kryetari i Bashkisë së Tiranës Erion Veliaj tha sonte se ishte i painformuar për çështjen ndaj Saimir Tahirit. I ftuar në emisionin “Top Story” Veliaj është treguar mjaft i ftohtë ndërsa fliste për ish-ministrin e Brendshëm Saimir Tahiri. Ai ka thënë se më deputetët e PS-së ka folur për çështjen e zonave, përfshirë edhe Tahirin, për çështje të Kombinatit, për investimet aty. Veliaj tha se ka komunikuar me Tahirin për solidaritet njerëzor, por vetëm kaq.
I njohur si rival i heshtur i Tahirit brenda PS-së, Velaj e ka mohuar që të kishte pasur kënaqësi apo “heshtje miratuese” pas asaj që i ndodhi Saimir Tahirit.
“Unë jam shkëputur nga puna e qeverisë që para dy vjet e gjysmë dhe gjithë kontaktet që kam pasur me deputetët kanë qenë për çështje të zonës, përfshirë edhe Saimirin, për çështje të Kombinatit, për investimet aty dhe kryetarët e bashkive nuk marrin pjesë as në mbledhje të grupit.
Në mbledhje të kryesisë, dy herë mbaj mend kam qenë edhe jashtë me shërbim për takuar kolegë, pra kam qenë komplet i pa përfshirë në këto debate dhe diskutime. Kësisoj, edhe disa herë me thënë të drejtën edhe i painformuar.
Një pjesë të madhe të gjërave i kam marrë nga media, por unë besoj që për të gjithë këto gjëra, drejtësia është akoma duke kërkuar të vërtetën dhe besoj që çdo lloj spekulimi me gjëra të paprovuara shton këtë dozën e dyshimit e mosbesimit në Shqipëri, ku ne i kemi gjërat më shumë me “më the, të thashë”, sesa me gjëra të provuara.
Në këtë sens, e kam parë thuajse si çdo qytetar, nga jashtë, pa ndonjë informacion të veçantë nga mbledhjet e partisë apo grupit ku unë s’jam pjesë” – tha Veliaj.
Pyetjes nëse kishte komunikuar me Tahirin, Veliaj iu përgjigj: “Kam komunikuar. Për një solidaritet njerëzor. Kaq!”
