Prokuroria e Sarandës ka kërkuar arrest me burg me afat 45 ditor për Ermal Fatajn, i cili dyshohet si personi përgjegjës për vdekjen e 15-vjeçares ruse në Ksamil, pas goditjes me një mjet uji.
Kërkesa e prokurorëve do të shqyrtohet të hënën dhe synon arrestin me afat derisa ekspertët të kthejnë një përgjigje pas ekspertizës biologjike.
Turistja 15-vjeçare kishte hyrë për t’u larë në ishujt e Ksamilit dhe më pas disa pushues e kanë vërejtur që trupi i vajzës po pluskonte pa jetë mbi ujë.
Pas dyshimeve se viktima mund të jetë goditur nga një mjet lundrues, prokurorët konstatuan fije floku në helikën e skafit që po drejtohej nga Fataj, por ky i fundit ka mohuar të jetë përgjegjës për ngjarjen e rëndë.
31-vjeçari ka thënë se nëse do kishte goditur viktimës, do të kishte ndaluar për t’i dhënë ndihmën e parë.
