Lëvizja Socialiste për Integrim deklaron se nuk ndjehet aspak e cënuar nga produkti i marrëveshjes Rama-Basha, ndërsa shpreh keqardhjen për mohimin e pjesmarrëjes së partive të vogla të garojnë në në koalicion.
Kryetari Petrit Vasili, gjatë një konference për shtyp, u shpreh besimplotë se partia që drejton do të dalë prej zgjedhjeve të 25 qershorit si forcë e parë, teksa iu referua kontributit, sipas tij të pazëvendësueshëm që LSI ka dhënë për gjetjen e konsensusit politik, konstruktivitetit që përcjell dhe programit që u ofron shqiptarëve për një mirëqenie më të lartë.
“LSI beson sot me shumë se dje, se do të jetë forcë e parë politike në këtë garë, pasi përfaqëson si asnjë forcë tjetër, konstruktivitet, integritet dhe transparencë, cilësitë themelore që ka nevojë Shqipëria”, deklaroi ai.
Gjatë komunikimit me gazetarët, pasuesi i Metës në krye të LSI-së, vlerësoi me shumë rëndësi tejkalimin e ngërçit politik dhe gjithpërshirjen e forcave politike në zgjedhje dhe shmangien e rrezikut të kaosit dhe pasigurisë në vend.
“Tashmë vendi është në dorë të qytetarëve. Janë ata që do të mund të vlerësojnë drejtë kontributin e çdonjërës forcë politike. LSI ka punuar fort për konsensusin dhe legjitimitetin e këtyre zgjedhjeve. Sot do të kemi garë të barabartë të të gjitha forcave politike”, tha Vasili.
