Pas shkarkimit të 12 drejtuesve në Policinë e Elbasanit, ka reaguar edhe kreu i grupit parlamentar të LSI-së, Petrit Vasili.
Ky i fundit qëndroi në të njëjtën linjë me Bashën, teksa tha se i pari që duhej të shkarkohej është kreu i Policisë së Shtetit, Haki Çako.
Vasili deklaroi se shkarkimet e sotme duhej të ishin bërë kohë më parë, por bëhen sot për të shmangur vëmendjen nga droga që ka përmbytur vendin.
FJALA E VASILIT:
“Situatë tepër e rëndë me të cilën po përballet vendi, shkarkimet e fundit në Elbasan, janë të vonuara. Ato duhej të bëheshin dy muaj më parë, por bëhen sot nga Çako për të shmangur vëmendjen nga droga që ka përmbytur vendin dhe për të hequr vëmendjen nga ngjarje të tjera tepër të rënda.
Po u bihet më qafë edhe drejtuesve të ndershëm duke i përziere me ata që janë mes llumit, siç ishte rasti i Dritan Zaganit, kur policë të ndershëm burgosen e largohen se i bëhen pengesë krimit dhe trafikut.
I shkarkuari i parë duhet të ishte Çako si mbështetësi dhe frymëzuesi i trafikut të drogës në vend dhe shkatërrues i krimit elektoral të 25 qershorit, me atë në krye të policisë rendi është pa elementë sigurie. Kryeministri shqiptar nuk do e kryejë kurrë këtë, pasi trembet për vdekje nga një shkarkim i tillë.
Për këto arsye Çako nuk duhet të jetë më në krye të policisë, pasi me atë në krye vendi nuk ka polici. Kryeministri trembet për vdekje të bëjë një shkarkim të tillë, pasi ka ngrënë një kusi të çorbës së krimit dhe trafiqeve deri në lugën e fundit”.
