Kreu i Lëvizjes Socialiste për Integrim, Petrit Vasili ka komentuar zgjedhjen e Ilir Metës si President i Republikës dhe zgjedhjen e tij në krye të LSI.
I ftuar në emisionin ‘Studio e Hapur” të gazetares Eni Vasili në “News24” kreu i ri i LSI tha se nuk e kishte menduar asnjëherë se mund të ishte ai kreu i ri i LSI. Ai u shpreh se Presidenca kërkoi Ilir Metën, jo Meta Presidencën.
“Jo nuk e dija asnjëherë se mund të isha unë kryetar i LSI. Kjo situatë erdhi pas zhvillimeve për zgjedhjen e presidentit, pasi ne pritëm disa raunde në mënyrë që të bëhej edhe opozita pjesë. Presidenca kërkoi Ilir Metën, jo Meta Presidencën.”- tha Vasili.
Gjithashtu, Vasli ka treguar disa detaje lidhur me takimin e Ramës me Metën te Pazari i ri.
“Në takimet Rama-Meta sigurisht që nuk diskutohej vetëm për politikë. Bisedohej për tema të ndryshme. Në darkën në zonën e Pazarit të ri, ndër të tjera u diskutua për rikonstruksionin e zonës së Pazarit të Ri, investimet e bëra, projektet. Shkëmbyem edhe kujtime. Unë si më i vjetër në moshë, kujtova edhe disa gjëra më shumë”, u shpreh Vasili.
