Shqipëria është përfshirë nga një valë e madhe e të nxehtit. Vlora është qyteti ku temperaturat kanë arritur pikën më të lartë. Temperaturat në këtë qytet kanë qenë 36.3°C, ndërsa për shkak të lagështirës, vlerat ndiheshin sikur të ishin 48°C.
“Qyteti i Vlorës sot shumë i nxehtë: T = 36.3°C, por prezenca e lagështirës prej 60%, bën që temp. të ndjehet ≈ 48°C.”, thuhet në një postim të Meteoalb në ‘Facebook’.
E njëjta situatë është ndjerë edhe në Tiranë, ku termometri ka shënuar 37 °C, por është ndjerë në 43 °C. Situata paraqitet alarmante edhe në Evropë, ku sipas Meteoalb temperaturat nga Jugu deri lart në Qendër kapin vlerën e 36°C në Alpet Evropiane, por mbi 44°C në gadishullin Iberik.
Ndryshe nga korriku i freskët dhe i lagësht, java e parë e gushtit është parashikuar e nxehtë. Kjo periudhë mendohet të jetë më e nxehta e këtij viti, ku temperaturat do t’i kalojnë 36 gradë.
