Dje në hotelin e familjes Gjoka në Velipojë, mbetën të plagosur me djegie të rënda pronarja e hotelit Alketa Gjoka 40-vjeç dhe fëmijët e saj, Klarisa Gjoka 15-vjeç, Danjela Gjoka 18-vjeç, Enriko Gjoka 19-vjeç, të cilët ndodhen në QSUT në Tiranë.
Shpërthimi ka qenë aq i fuqishëm, sa që kati i parë i hotelit është shkrumbuar. Sipas ISHTI-t, shpërthimi dhe zjarri dyshohet të ketë ndodhur nga rrjedhja e gazit nga një nga bombolat, e cila mund të jetë harruar e hapur gjatë natës.
Katër anëtarët e familjes kanë pësuar djegie të rënda në trup, 80 deri në 90%. Aktualisht janë duke u trajtuar me mjekim intensiv dhe në ndjekje të vazhdueshme nga stafi mjekësor në QSUT.
E ëma e Alketa Gjokës ka thënë për mediat se vajza ka qenë duke bërë kafen, dhe sa ka ndezur shkrepësen ka marrë flakë. Ndërkohë që fëmijët kanë qenë në gjumë.
“Na thanë që kemi dhimbje trupi. Kanë qenë duke fjetur, vajza ka qenë duke bërë kafen. Sa ka ndezur shkrepësen, ka marrë flakë aty. Fëmijët kanë qenë duke fjetur, vetëm kur iu ka shkuar flaka te shtrati. Vetëm Zoti e di dhe doktori. E ka në dorë doktori”, tha ndër të tjera ajo.
