Kryetarja e LSI-së, Monika Kryemadhi qartëson deklaratën e lëshuar mbrëmjen e djeshme gjatë një debati me analistin Fatos Lubonja lidhur me çështjen e studimeve jashtë shtetit të vajzës së saj.
“Nuk ndihem keq që fëmija im shkollohet në Angli për matematikë. Kush do ta shkollonte vajzën time për matematikë në Universitetin e Tiranës? Më gjej një pedagog të matematikës ti që ma shkollon vajzën mua për matematikë”, pohoi të martën Kryemadhi.
E ftuar në “Fax News”, Kryemadhi shprehet se fjala e saj u keqinterpretua, teksa thekson se si prind është krenare për vajzën, për të cilën thotë se ka zgjedhur të studiojë një degë të vështirë siç është matematika, ndërsa si politikane shprehet se ka dështuar.
“E kam thënë dje dhe u keqkuptua me Lubonjën. Të studiosh matematikën sot është nga zgjedhjet më të vështira. Si prind jam krenare, e ka një dhunti dhe si politikane jam e dështuar pse të mos ia siguroj vajzës time një student ekselente të studiojë këtu.
Më herët kemi pasur disa nga universitetet më të mira në Rajon. Nëse unë kam bërë gabim është shoqëria që ma mbulon gabim. Çfarë ka ndodhur? Ne kemi bërë kompromis me njëri-tjetrin, herë për interes, herë për zgjidhjen e situatave por hajde ta diskutojmë”, tha Kryemadhi.
