Serena Williams pas një kohe të gjatë shkëputje nga fushat e tenisit është rikthyer sërish si protagoniste. Ajo mungoi vitin e kaluar pasi u bë nënë dhe tashmë është rikthyer sërish në fgormë duke prekuyr finalen e “US Open”. Williams ka mposhtur Sevastovën dhe është kualifikuar finalen e këtij turneeu, ku do të kërkojë titullin e 24 dhe të parin me statusin e nënës.
Në ndeshjen me letonezen, ish-numri 1 i botës nuk e zgjati shumë dhe iu deshën vetëm 1 orë e 5 minuta lojë për të thyer kundërshtaren e saj me rezultatin 2-0.
Serena Williams i dha mundësinë Sevastovës të fitojë vetëm 3 “game” në këtë ndeshje, ato të setit të parë, të cilin e mbylli 6-3. Seti i dytë nuk pati histori, me amerikanen që e fitoi pastër 6-0.
Kundërshtarja e Serena Williams në finale do të jetë japonezja Naomi Osaka, e cila në ndeshjen tjetër gjysmëfinale mundi finalisten e vitit të kaluar Madison Keys, duke shuar mundësinë për të parë një tjetër finale amerikane në “Flushing Meadows”.
Osakës iu deshën 1 orë e 25 minuta lojë për të fituar ndeshjen me rezultatin 2-0. Ajo u shfaq superiore kundrejt Madison Keys dhe i fitoi setet 6-2 dhe 6-4, për t’u bërë e para teniste nga Japonia që luan finalen e një turneu “Grand Slam”.
