Ish-kreu i LSI-së, Petrit Vasili ka reaguar pas postimit të kryeministrit Rama lidhur me reformimin e Akademisë së Shkencave.
Kryeministri Edi Rama shkroi sot në Facebook, se duhet të ndalohet farsa zgjedhore në Akademinë e Shkencave, përndryshe kjo e fundit nuk do të marrë asnjë qindarkë nga buxheti, madje do t’i duhet të dorëzojë edhe godinën.
Lidhur me këtë deklaratë, Vasili shkruan se “nga gjithë ky debat, kryeministri ynë shkollëpak ka kuptuar vetëm që duhet t’i rrëmbejë godinën dhe të mos i japë ca lekurina Akademisë”.
Më poshtë postimi i plotë i Vasilit:
Shkollëpakti flet për godinën e Akademisë së Shkencave
Akademia e Shkencave ka nevojë të transformojë rrënjësisht raportin e saj me shoqërinë dhe vendin. Edhe menaxhimi i saj i brendshëm duhet të ndryshojë.
Akademia dhe akademikët duhet të jenë pjesë e vyer e debatit publik multivalencial, por ata i kanë munguar këtij debati, ndaj edhe ai është shpesh shumë i varfër dhe domen i profanëve të paskrupuj.
Raporti i akademisë me shkencëtarët e rinj të talentuar, që formohen në Shqipëri dhe jashtë saj dhe me kërkimin shkencor në tërësi, është i ngurtë dhe joinspirues.
Këto janë çështje madhore, që duan përgjigje, e që edhe ne i duam këto përgjigje.
Një tjetër Akademi Shkencash i duhet vendit. Zgjedhjet brenda saj, që riciklojnë problemet e vjetra dhe nuk na i japin këto përgjigje, përse duhen?
Nga i gjithë ky debat i madh konceptual dhe parimor kryeministri ynë shkollëpak ka kuptuar vetëm që duhet t’i rrëmbejë godinën dhe të mos i japë më ca lekurina Akademisë.
Aq di, kot t’i kërkojmë më shumë atij.
