Drejtori i ARSH-së Afrim Qendro ka urdhëruar ngritjen e tre grupeve pune për shpronësimet që parashikohen të bëhen nga projekti i rehabilitimit të segmentit rrugor nga “Sheshi Shqiponja” deri të mbikalimi pranë “Pallatit me Shigjeta”.
Grupet drejtohen nga Ermal Shena, Olsi Mema e Ilir Gjorga dhe kanë secili nga 8 anëtarë.
Sipas urdhrit, dorëzimet e kërkesave për shpronësim, parashikohet të bëhen brenda muajit dhjetor.
Detyrat e grupeve, sipas urdhrit që mban firmën e kreut të ARSH-së, janë:
Matja dhe vlerësimi i të gjitha pasurive që preken nga projekti.
Kryerja e të gjitha korrespondencave me institucionet shtetërore për marrjen e dokumentacionit dhe konfirmimeve që nevojiten për plotësimin e kërkesës për shpronësim.
Plotësimin e kërkesës për shpronësim për të gjitha pasuritë pronë private sipas legjislacionit në fuqi.
Dorëzimin e kërkesës për shpronësim brenda muajit dhjetor.
Në bashkëpunim me institucionet shtetërore, të kryejnë matjet, vlerësimin si dhe përgatitjen e dokumentacionit tekniko-ligjo për kalimin kapital për të gjitha pasuritë shtetërore që preken nga projekti i zbatimit.
Banorët, pronat e të cilëve preken nga ky projekt, po protestojnë prej ditësh, duke kërkuar dëmshpërblime me vlera tregu, pavarësisht nëse janë ose jo të legalizuar.
