Prurja e shumtë e ujit në Lumin Mat ka shkaktuar sërish probleme në Urën e Zogut në Milot.
Marrja e inerteve pranë këmbëve te urës, ka bërë që ura të dalë jashtë funksionit. Ndërkohë, ditën e sotme ajo ka pësuar thyerje në mes, pasi njëra prej këmbëve të saj ka rënë mbi 30 centrimetra.
Deri më tani, nuk ka pasur asnjë ndërhyrje për të parandaluar marrjen e inerteve në lumin e Matit.
Ura e Zogut është një nga më të veçantat për strukturën e saj arkitekturore. Stili i harqeve i japin asaj vlerë muzeore. Ajo gjendet në të majtë të rrugës së Kombit, në të dyja ekstremet e lumit Mat, që nga viti 1927.
E quajtur për shumë vite Ura e Zogut, vetë mbreti ishte ideatori i ndërtimit të kësaj ure shumëfunksionale, sidomos për kohën. Ato vite ajo ishte një portë e domosdoshme për të hyrë në Shqipërinë e epërme që përfshin Shkodrën, Lezhën, Mirditën, Tropojën, Kukësin, Pukën etj.
Ura është projektuar nga një inxhinier italian Martini dhe pothuajse e gjithë baza materiale u soll nga italianët.
