Tarifat e shkollimit janë rritur nga viti 2011 deri në 2016. Edhe pse këtë vit nuk pati ndryshim, studentët vitet e fundit paguajnë mesatarisht 10 mijë lekë më shumë për të marrë dije në universitetet shqiptare.
Rritjen më të lartë në vlerë absolute e ka pësuar tarifa për Fakultetin e Mjekësisë, Fakultetin e Ekonomisë dhe Agrobiznesit në programin “Menaxhim agrobiznesi”. Fakulteti i Mjekësisë Veterinare, vitet e fundit ka pësuar rritje me rreth 19. 500 lekë. Rritje të lartë ka shënuar edhe Fakulteti i Shkencave Pyjore në programin “Mbarështim pyjesh” me 14. 670 lekë, Universiteti i Sporteve të Tiranës me 14. 560 lekë si dhe Fakultetet e Mjekësisë Dentare dhe Fakulteti i Farmacisë me 14 340 lekë.
Bie në sy se përgjithësisht, tarifat për universitet e rretheve kanë përjetuar rritje më të ulët se sa universitetet që operojnë në Tiranë, duke veçuar universitetin “Ismail Qemali” në Vlorë si institucioni me rritjen më të vogël të tarifave 5. 692 lekë.
Duke krahasuar rritjen e tarifave në vitin 2015-2016 me vitin 2010-2011 të shprehur në përqindje vihet re një ndryshim i lartë i tarifave të tre fakulteteve të Universitetit Bujqësor të Tiranës, përkatësisht Fakulteti i Ekonomisë dhe Agrobiznesit në programin “Menaxhim agrobiznesi” me 128% apo 2.2 herë, Fakulteti i Mjekësisë Veterinare dhe Fakulteti i Shkencave Pyjore në programin “Mbarështim pyjesh”.
Ndërkohë që rritjen më të vogël e kanë pasur tarifat e Universitetit të Tiranës në degët ekonomik me 37%, shkenca sociale 30.5% dhe drejtësi me 30.5%.
