Kancelarja gjermane Angela Merkel ka theksuar se nuk ka “zgjidhje ushtarake” pasi udhëheqësi i Ukrainës i kërkoi NATO-s që të dërgonte anije në Detin e Azov. Kërkesa e Petro Poroshenko erdhi pas një konfrontimi detar me Rusinë në ujërat e Krimesë.
Të dielën, Rusia hapi zjarr mbi tre anije të Ukrainës dhe konfiskoi ekuipazhet e tyre në ngushticën Kerç. Merkel tha se kriza ishte krejtësisht përgjegjësi e veprimit të presidentit rus Putin. Megjithatë, ajo tha se “çështjet si këto mund të zgjidhen vetëm me dialog të ndjeshëm”.
Nga ana tjetër, presidenti rus Vladimir Putin akuzoi Poroshenkon për krijimin e “provokimit” detar për të rritur vlerësimet e tij përpara zgjedhjeve të vitit 2019.
Presidenti Poroshenko ka zbatuar ligjin ushtarak përgjatë rajoneve kufitare të Ukrainës për 30 ditë në përgjigje të krizës.
Ndërkohë, mediat shtetërore ruse raportojnë se Moska ka dorëzuar një batalion të raketave S-400 në veri të Krimesë dhe gjithashtu ka në plan të ndërtojë një stacion radar të paralajmërimit të hershëm të raketave atje.
A do e ndihmojë NATO Ukrainën?
Organizata e Traktatit të Atlantikut Verior është aleanca më e fuqishme rajonale e mbrojtjes në botë dhe anëtarët pajtohen se një sulm i armatosur kundër njërit konsiderohet një sulm kundër të gjithë atyre.
Ukraina nuk është anëtare e NATO-s, por është një vend partner i NATO-s, që do të thotë se ata bashkëpunojnë në disa çështje politike dhe të sigurisë.
Poroshenko i tha gazetës gjermane Bild: “Gjermania është një nga aleatët tanë më të ngushtë dhe ne shpresojmë që shtetet brenda NATO-s janë gati të zhvendosin anijet detare në Detin e Azov, në mënyrë që të ndihmojnë Ukrainën dhe të ofrojnë siguri”.
“Ne nuk mund ta pranojmë këtë politikë agresive të Rusisë. Së pari, ishte Krimeja, pastaj pjesa lindore e Ukrainës, tani ai dëshiron Detin e Azov. Edhe Gjermania duhet të pyetet: çfarë do të bëjë Putini nëse nuk e ndalojmë atë?”
Çfarë tha Merkel?
Duke folur së bashku me Kryeministrin e Ukrainës, Volodymyr Groysman në një forum biznesi në Berlin, Merkel premtoi të zhvillojë bisedime me Putin në samitin e ardhshëm të G20:
“Dua që ushtarët ukrainas të lirohen,” tha ajo. “Ne duhet të bëjmë gjithçka për të ndihmuar vende si Mariupol, e cila varet nga qasja në det. Pala ukrainase na ka kërkuar që të veprojmë me mençuri … nuk ka zgjidhje ushtarake për këto probleme, ne duhet ta theksojmë këtë.”/ TIRANA TODAY
