Ukraina ka paralajmëruar se Rusia “pothuajse ka përfunduar” ndërtimin e saj të forcave që mund të përdoren për një ofensivë kundër vendit, duke shtuar frikën se Moska mund të nisë një pushtim në çdo kohë.
Sipas vlerësimit të fundit të inteligjencës të Ministrisë së Mbrojtjes të Ukrainës, Rusia tani ka vendosur më shumë se 127.000 trupa në rajon. Ukraina beson se Rusia “po përpiqet të ndajë dhe dobësojë Bashkimin Evropian dhe NATO-n”.
Veprimet e Rusisë synojnë gjithashtu kufizimin e aftësive të Shteteve të Bashkuara, “për të garantuar sigurinë në kontinentin evropian”.
Vlerësimi vjen pasi tre raunde bisedimesh diplomatike midis Rusisë dhe Perëndimit që synonin de-përshkallëzimin e krizës nuk arritën të jepnin një zgjidhje javën e kaluar.
Zëvendës Sekretarja e Shtetit e SHBA, Wendy Sherman, tha të mërkurën e kaluar se ishte e paqartë nëse Moska synonte të përdorte bisedimet si pretekst për të pretenduar se diplomacia nuk mund të funksionojë.
Inteligjenca ushtarake ukrainase tha se Rusia ka dislokuar trupa nga rajonet e saj qendrore dhe lindore në kufirin e saj perëndimor “në baza të përhershme”. Në fund të dhjetorit dhe në janar, Rusia ka lëvizur “bazën e municioneve, spitalet në terren dhe shërbimet e sigurisë” në kufi, ku sipas Ukrainës “konfirmon përgatitjen për operacione sulmuese”.
Vlerësimi i ri tha gjithashtu se Rusia mbështet më shumë se 35.000 rebelë në Ukrainën lindore dhe ka rreth 3.000 nga personeli i saj ushtarak i vendosur në territorin rebel. Moska mohon të ketë ndonjë forcë në Ukrainën lindore.
Aktiviteti i inteligjencës ruse kundër Ukrainës është intensifikuar gjithashtu, thuhet në vlerësim, me njësi shtesë të trafikut të radios dhe satelitit që janë vendosur pranë kufirit ukrainas dhe fluturimet e zbulimit përgjatë kufirit janë trefishuar që nga viti i kaluar.
Ushtria ukrainase tha gjithashtu se Rusia mund të përdorë armë raketore me rreze të mesme veprimi për të “shkatërruar objekte jetike”, duke vënë në dukje se “grupe taktike shtesë të raketave operative-taktike “Iskander” janë transferuar në kufi.
Sipas vlerësimit, që nga mesi i janarit ka 36 lëshues Iskander pranë Ukrainës. Raketat Iskander janë të afta të godasin objektiva 500-700 km (përafërsisht 310-430 milje) larg dhe tani mund të synojnë zona përfshirë kryeqytetin, Kiev.
Burimi i lajmit: CNN. Përshtatur nga Tirana Today
