Gjysmëfinalja mes Liverpool dhe Romës në Champions League dhuruan mjaft emocione, por duket se telashet do të vazhdojnë për të dy ekipet të cilat nuk do të shpëtojnë pa u ndëshkuar nga UEFA. Në ndeshjen e parë të zhvilluar më 24 prill në Angli, trazirat në prag të ndeshjes ishin të shumta.
Autoriteti më i lartë futbollistik në Europë, UEFA ka hapur një çështje të re për këto trazira dhe në një komunikatë dërguar klubeve, UEFA u kërkon të japin shpjegim për “ndezjen e tymueseve, hedhjen e objekteve të palejuara në fushë, si edhe për trazira të ndryshme në shkallët e stadiumit”.
Para ndeshjes në Anfield pati edhe përplasje mes dy tifozerive, që përfunduan me plagosjen e një irlandezi, tifoz i Liverpool. Vendimi i këtij procesi të dytë për këtë ndeshje do të vijë pas takimit të komitetit disiplinor, etikës dhe kontrollit të UEFA-s të planifikuar për të enjten e 31 majit.
