Zgjedhjet në Federatën Shqiptare të Futbollit kanë marrë përmasa të mëdha, saqë jehona shkoi deri në zyrat e UEFA-s dhe një delegacion i tyre i kryesuar nga zv.presidenti i UEFA-s, Grigori Surkis zbarkoi në Tiranë. Ai ka zhvilluar takime me kryeministrin Rama dhe me presidentin e FSHF-së, Armand Dukën. Kryefjala e këtyre takimeve ka qenë shqetësimi i madh që ka në këto zgjedhje që duhet të jenë të lira, pasi janë për një organizatë jofitimprurëse, po ndikohen nga politika, gjë që është e papranueshme nga UEFA.
Pas takimeve Surkis tha për mediat: “Delegacioni ynë erdhi në Shqipëri me një mision paqeje, sipas udhëzimeve që kemi marrë nga presidenti i UEFA-s, zoti Ceferin. E dëgjuam njëri-tjetrin dhe kuptuam pozicionet e secilës palë. Qëllimi i vizitës tonë lidhej me shqetësimin, pas sinjalizimeve që kemi marrë së fundi rreth tentativave të palëve të treta për të ndërhyrë në procesin zgjedhor. Sa i takon asamblesë së 7 shkurtit ndamë opinione. Shpresoj dhe besoj se na dëgjuan me kujdes.
Përfaqësuesit e FIFA-s dhe UEFA-s do të jenë të pranishëm në Asamblenë Zgjedhore të 7 Shkurtit dhe do të vazhdojmë të mbajmë të njëjtin qëndrim. “Ne kujdesemi për futbollin”, kjo është moto jonë. E kuptojmë që zhvillimi i futbollit nuk është i mundur në asnjë vend pa punën dhe energjitë e autoriteteve shtetërore, përkrah federatave. Takimi me kryeministrin? Nuk firmosëm asnjë memorandum, por dëgjuam njëri-tjetrin dhe besoj se secila palë ka nxjerrë përfundimet e veta. Jemi në një proces që vazhdon dhe këto janë komentet e vetme që mund t’ju jap për momentin. Gjithçka do të bëhet hap pas hapi”, deklaroi Surkis.
