Në dy sezonet e fundit, FSHF ka paraqitur kandidaturën e saj zyrtare për të përfituar të drejtën e organizimit të Superkupës së Europës në Tiranë, por në asnjërin rast, UEFA nuk ia ka dhënë këtë të drejtë. Megjithatë, Federata Shqiptare e Futbollit ka këmbëngulur se me punë do të vijë dita që organizimi të bëhet në Tiranë, por mesa duket, UEFA është “lodhur” nga kjo këmbëngulje.
Pak muaj më parë, ishte stadiumi i Portos ai që u zgjodh për organizimin e Superkupës 2020, ndërkohë që FSHF shprehej se Shqipëria do të jetë sërish kandidate për të provuar organizimin e kësaj finaleje. Por, ditën e sotme, UEFA ka publikuar listën me vendet kandidate për të organizuar në vitet e ardhshme finalen e Superkupës së Europës, Ligës së Kampionëve, Ligës së Europës dhe finalen e Ligës së Kampionëve për femra.
Në listën me vendet kandidate, bie në sy mungesa e Shqipërisë dhe me shumë gjasa, UEFA ka refuzuar aplikimin e FSHF-së duke qenë se në dy rastet e para, nuk ka arritur të fitojë të drejtën për organizimin e kësaj finaleje. Stadiumi që FSHF kërkon të organizojë ndeshjen është “Arena Kombëtare”. Por tashmë nuk dihet nëse ky refuzim ka ardhur për shkak se stadiumi nuk është përfunduar apo ndonjë arsye tjetër.
