Gazetari i gazetës gjermane ‘BILD’, Peter Tiede, ka zbuluar se nuk ka asnjë padi gjyqësore nga kryeministri Rama ndaj tij, apo gazetës ‘BILD’, pas publikimit të përgjimeve të shitblerjes së votave. Në një komunikim ekskluziv për “FaxNews”, ai ka konfirmuar se një hap i tillë nuk ka ndodhur, dhe se nuk ka asnjë procedim penal apo padi në gjykate ndaj tij apo ‘BILD.
Gazetari thotë se një muaj më parë ka mbërritur në redaksi një letër nga avokati i Ramës, ku nënvizohej se nuk ka qenë i përfshirë me krimin dhe se votat nuk janë blerë. Po kështu ai sqaron më tej se avokati i Ramës duhet të kishte shkuar në gjykatë, por një gjë e tillë nuk ka ndodhur.
“Nuk ka ndodhur aspak një gjë e tillë. Një muaj më parë erdhi thjesht një letër nga avokati i kryeministrit tuaj, një letër me dengla në të cilën thuhej se kryeministri nuk ka qenë kurrë në lidhje me krimin apo mafian, që votat nuk janë blerë.
Përgjigjja jonë është se e gjithë kjo është pa sens, e pakuptimtë. Nuk ka asgjë, asgjë me të vërtetë. Asnjë procedurë, asnjë padi, asgjë… Avokati i kryeministrit duhet të kishte shkuar në gjykatë, por nuk ka shkuar, e as ne nuk jemi thirrur. Nuk ka asgjë ndaj meje dhe as ‘BILD’-it në gjykatë apo ndokund tjetër”.
