Kampionia dhe rekordmenia e Europës, Luiza Gega, po nderohet me një ceremoni në bulevardin “Dëshmorët e Kombit”. Si asnjëherë më parë, Shqipëria tashmë ka edhe një kampione Europe në atletikë, dhe ajo është e vetmja sportiste shqiptare në këtë sport elitar.
Luiza Gega është pritur nga qindra qytetarë me flamuj kombëtarë, të cilët kanë përshëndetur kampionen. Ajo nuk është përmbajtur dot nga emocionet, teksa ka shpërthyer në lot. Qytetarët e shumtë e kanë duartrokitur.
Atletja kuqezi, u rikthye në atdhe një ditë më parë, ku u prit në Rinas nga Ministrja e Arsimit dhe Sportit Evis Kushi dhe nga presidenti i KOKSH, Fidel Ylli.
“Një punë e palodhur dhe plot sakrifica” e konsideroi atletja shqiptare Gega, arritjet e saj duke thënë se nuk do të ndalet dhe se ndihet krenare për ngjyrat e flamurit që përfaqëson.
