Pas lajmit që bëri bujë në media lidhur me rikthimin e një mësuesi në detyrë, i cili ka qenë i dënuar më parë për pedofili, mësohet se Zyra Arsimore ka marrë vendimin final. Ky rast është evidentuar në një nga shkollat më të mira 9-vjeçare të qytetit të Beratit, në shkollën “22 Tetori”.
Prej disa ditësh, në këtë shkollë është emëruar mësues për lëndët e “fizikës” dhe “informatikës” 62-vjeçari Ëngjëll Bregu, i cili rezulton të jetë dënuar për “pedolifi” dhe “ngacmim seksual” të fëmijëve në vitin 2003.
Juristja e Zyrës Arsimore Berat, ka konfirmur se gjithçka është realizuar sipas procedurave ligjore dhe se nuk kishin dijeni për të kaluarën e z. Bregu, pasi dëshmia e penalitetit i dilte e pastër. Vetëm pak minuta më pas Zyra Arsimore njoftoi shkarkimin.
Në vitin 2003, disa nxënëse të shkollës 9-vjeçare “Uznovë” në Berat e kanë denoncuar mësuesin e tyre kujdestar Ëngjëll Bregu, se gjatë një eskursioni në Bogovë ai i kishte prekur në pjesët intime të trupit.
Nxënëset e cilësuan atë si maniak dhe të rrezikshëm. Mësuesi u arrestua dhe u dënua për “pedofili” dhe “ngacmim seksual” nga Gjykata e Beratit me 7-muaj burg, por gjykata nuk ia hoqi asokohe të drejtën e rikthimit në detyrë edhe pse u kërkua nga prokuroria.
