Emri i pedagogut Edmond Tupe u lakua sot nga ana e uniformave blu. Ai ka thënë për “Report Tv” se nuk është organizator, dhe se ka qënë dhe do të jetë një nga mbështetësit e flaktë të studentëve. Me tone ironike, pedagogu thotë se ka një falenderim ndaj organeve kompetente që e kanë proceduar, duke e bërë hero pa asnjë shkak.
“Së pari, unë nuk jam organizator. Organizatorët e kësaj lëvizje të fuqishme, janë vetë studentët. Unë nuk jam student. E kanë marrë ata në dorë, edhe me të drejtë.
Unë kam qenë edhe do të jem një nga mbështetësit e lëvizjes së tyre. Përveç kësaj, do të thosha që kjo është çudi e madhe për mua, sepse unë s’kam penguar aspak qarkullimin e automjeteve.
Unë isha bashkë me studentët e tjerë, tek “Zogu i Zi”, siç kam qenë çdo ditë tek “Rruga e Durrësit” (para MAS) ku edhe aty “u pengua” qarkullimi. Kështu që, normalisht duhet që të procedohen 5 mijë vetë, disa mijëra studentë që morën pjesë në Tiranë, edhe disa mijëra të tjerë nëpër rrethe. Kjo është qesharake. Është vërtet qesharake.
Megjithatë duhet që ta falenderoj, organet kompetente që më kanë proceduar. Sigurisht që ata kanë marrë një urdhër nga kryeministri, apo nga kanalet kryeministrore. Sepse ata po bëjnë çmos për të më bëjnë hero me zor.
Unë s’dua që të bëhem hero. Duan që të më bëjnë hero, mua edhe Robert Alinë. Përse? Sepse kemi mbështetur studentët. Kjo është një mënyrë shumë e padrejtë për të frikësuar njerëzit, studentët.
Shpirtërisht edhe fizikisht jam me studentët. Të tetë pikat duhet që të pranohen nga qeveria, edhe studentët të marrin vlerësimin që meritojnë.
Ata humbasin disa ditë apo disa javë për të fituar shumë gjëra. Me studentët kudo në botë, kanë filluar lëvizjet e mëdha. I përgëzoj edhe i inkurajoj me gjithë mbështetjen time morale edhe fizike, që ta vazhdojnë lëvizjen e tyre”.
