Tirana do të luajë në Kategorinë e Parë dhe po përgatitet të luajë me futbollistë cilësorë. Tregu i futbollistëve afrikan, me Merveilin dhe Akuahin, rezultoi më se i suksesshëm për bardhe blutë dhe mendohet që edhe kësaj here kjo pistë do të mbetet e vlefshme.
Mediat vendase në Ugandë kanë bërë me dije se Tirana ka pikëtuar një nga lojtarët e kësaj kombëtareje, mesfushorin 26-vjeçar, Toni Maveje. Futbollisti numëron 65 ndeshje me skuadrën kombëtare dhe duket se do të jetë një alternativë shumë e vlefshme për skemat e Ze Marias.
Mësohet se drejtuesit e Tiranës kanë nisur prej disa ditësh bisedimet rreth transferimit të këtij futbollisti. “Kavovo sports” ka zbuluar se Maveje është një lojtar, i cili pak kohë më parë ka qenë edhe në planet e skuadrës së Beshiktashit. Sipas këtij sajti informativ, Tirana me anë të drejtuesve të saj, ka diskutuar rreth mundësisë reale të transferimit të lojtarit dhe tashmë mbetet thjesht transferimi i tij në kryeqytetin shqiptar.
Ndërkohë që Maveje është një mesfushor me tipare defensive. Kartoni i tij vlerësohet rreth 50 mijë euro. Meqenëse Akuah është drejt largimit, bardheblutë kanë gjetur pothuajse një zëvendësues ideal për të në mesfushë përkrah Karabecit dhe Dajës. Maveje është bërë pjesë e Kombëtares në vitin 2004 dhe numëron 65 ndeshje, në të cilat ka shënuar tetë gola. Ka qenë pjesë e kampionatit islandez në dy sezonet e fundit.
