Kreu i Njësisë Administrative Kallmet, Besnik Simoni, është arrestuar. Atij i është komunikuar masa e arrestit në Spitalin e Traumës, aty ku është shtruar që dje pasi u plagos me armë. Policia ka njoftuar zyrtarisht se mes administratorit dhe autorit të ngjarjes, Altin Marku, ka pasur shkëmbim zjarri. Kjo pasi edhe Marku, i cili u arrestua pas disa orësh kërkimi, është i plagosur. Ngjarja u regjistrua rreth orës 13:15, në fshatin Kallmet, Lezhë, pas një konflikti verbal që Simoni ka patur në zyrë me autorin. Më pas ky i fundit i ka bërë pritë në rrugë dhe e ka qëlluar me pistoletë.
Në vendin e krimit u gjetën 19 gëzhoja, teksa mësohet se tre prej plumbave e kanë kapur Simonin në trup. Ai u qëllua me pistoletë në mes të rrugës nga Altin Marku. Fillimisht Besnik Simoni u dërgua në Spitalin e Lezhës dhe më pas u dërgua në Spitalin e Traumës për të marrë mjekim më të specializuar, pasi kishte tre plumba në trup. Policia njofton se në cilësinë e provës materiale janë sekuestruar një armë zjarri pistoletë, me një krehër me gjashtë fishekë, e cila dyshohet se është përdorur nga shtetasi Altin Marku, si dhe dy automjete. Vijon puna për gjetjen e armës tjetër pistoletë, të përdorur gjatë konfliktit.
Njoftimi
Në vijim të veprimeve hetimore dhe operacionale të kryera për zbardhjen e rrethanave të ngjarjes së ndodhur më datë 01.04.2022, në Kallmet të Lezhës, ku si pasojë e një konflikti me armë zjarri mbeti i plagosur kryetari i Njësisë Administrative Kallmet, shtetasi B. S., shërbimet e Policisë, pas disa orë kërkimesh, kanë bërë të mundur kapjen dhe arrestimin e shtetasit A. M., i cili në momentin e kapjes është konstatuar se ka qenë i plagosur me armë zjarri, për këtë arsye është transportuar në Spitalin e Traumës Tiranë.
Si rezultat i veprimeve të thelluara hetimore, u bë e mundur zbardhja e rrethanave të ngjarjes, ku ka rezultuar se:
Më datë 01.04.2022, rreth orës 13:15, në fshatin Kallmet, Lezhë, pas një konflikti për motive të dobëta, shtetasit e lartpërmëndur kanë qëlluar me armë zjarri pistoleta, në drejtim të njëri-tjetrit dhe për pasojë ka mbetur i plagosur shtetasi B. S., i cili pasi ka marrë ndihmën e parë mjekësore në Spitalin Rajonal Lezhë, është transportuar në Spitalin e Traumës Tiranë, ku ndodhet në gjendje të rëndë shëndetësore, ndërsa shtetasi A. M. është larguar menjëherë nga vendi i ngjarjes, duke u fshehur për disa orë, deri sa është lokalizuar dhe është arrestuar nga shërbimet e Policisë.
Në përfundim të veprimeve u bë arrestimi në flagrancë i shtetasve:
A. M., 41 vjeç, banues në fshatin Kallmet-Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”;
B. S., 42 vjeç, banues në fshatin Kallmet, Lezhë, me detyrë administrator i Njësisë Administartive Kallmet, Bashkia Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”.
Në cilësinë e provës materiale janë sekuestruar 1 armë zjarri pistoletë, me një krehër me 6 fishekë, e cila dyshohet se është përdorur nga shtetasi A. M., si dhe dy automjete.
Vijon puna për gjetjen e armës tjetër pistoletë, të përdorur gjatë konfliktit.
Materialet proceduriale i kaluan Prokurorisë së Rrethit Gjyqësor Lezhë, për veprime të mëtejshme.
