Lotët nuk mund t’i ndalte sa herë kujtonte ngjarjen e shëmtuar që i rrokullisi gjithë jetën dhe e bëri nënë në moshën 15-vjeçare. Historia e adoleshentes nga fshati Velçan i Pogradecit që u përdhunua nga fqinji i saj 55-vjeçar ka ardhur sot në emisionin “Me zemër të hapur” në News24. Bashkë me prindërit e saj ajo ka treguar përdhunimin, shtatzëninë dhe më pas lindjen e fëmijës, fryt i këtij akti.
Po familja ka edhe një apel për ndihmë. Ata thonë se kërcënohen nga familja e Ligor Bibës për të tërhequr padinë. Për këtë qëllim iu kanë ofruar dhe para por nuk i kanë pranuar. Mes lotësh e duke u ndalur disa herë, adoleshentja që tani nuk shkon më as në shkollë tha se nuk e ka parë fëmijën që ka braktisur sapo e ka lindur dhe se nuk do ta shohë.
“Kur Ligori erdhi në shtëpi mami dhe babi ishin tek motra, vëllai me lopë. Ai erdhi, ishte pak si i pirë dhe më shtyu dhe…(qan). Më tha se po i tregove njeriu do të vras”, tregon vajza.
Ajo rrëfen se shtatzëninë e kishte kuptuar vetëm pasi kishte bërë vizitë dhe infermierja e fshatit kishte lajmëruar policinë.
“Infermierja nuk më tregoi as mua vetëm lajmëroi policinë. Shefi i krimeve ishte i pari të cilit i tregova. Fëmijën as nuk e kam parë, as nuk ta shoh (qan).
Në shkollë nuk shkoj sepse ata kanë ardhur dhe tek shtëpia dhe kërcënojnë. (qan)”, ka thënë ajo mes lotësh.
Edhe nëna e 16-vjeçares tha se e kishte marrë vesh nga infermierja se vajza kishte mbetur shtatzënë. “Infermierja e fshatit na tregoi që ishte shtatzënë. E dorëzuam fëmijën sepse nuk e mbanim dot”, tha ajo.
Ndërsa i ati jo pak i tronditur tha se do kishte pranuar më mirë ta vrisnin se të ndodhte kjo gjë. “Unë po zieja rakinë, erdhi gruaja dhe më tregoi. Erdhi policia në shtëpi. Më mirë të na kishte vrarë, se të kishte bërë këtë punë. Ai është i lumtur se e gjeti me mua, se ta kishte bërë me ndonjë tjetër do ishte i vrarë”, tha babai i adoleshentes./BW/
