Policia e Tiranës ka reaguar pas arrestimit të dy efektivëve, të cilët dyshohet se kanë vjedhur me dhunë të rinjtë në zonën e liqenit në Tiranë. Bëhet fjalë për policin e patrullës së Komisariatit nr.1, Serxhio Cani 22 vjeç dhe policin bashkiak, Sajmir Muzikanti, 39 vjeç.
Të dyshuarit janë mbajtur nën vëzhgim për disa javë, pasi kohët e fundit, denoncimet për grabitje që kishin ardhur në komisariatin nr. 1 në kryeqytet, ishin rritur.
Dy policët Serxhio Cani dhe Sajmir Muzikanti kanë rënë në pranga, pasi akuzohen për vjedhje në zonën e liqenit artificial në Tiranë. Mësohet se ndaj tyre ishin bërë 9 kallëzime, por vetëm 3 raste janë dokumentuar.
Policët ndalonin të rinj që pinin hashash te liqeni, iu vinin pranga dhe pasi iu merrnin para i lironin. Ata u merrnin të rinjve që pinin hashash 20 deri në 50 mijë lekë për t’i lënë më pas të lirë.
Njoftimi nga Policia Tiranë
Specialistët për Hetimin e Krimeve të Komisariatit të Policisë Nr. 1, në bashkëpunim me specialistët e Drejtorisë Rajonale të AMP-së, ndaluan shtetasit:
– S. M., 39 vjeç, me detyrë punonjës i Policisë Bashkiake dhe S. C., 22 vjeç, me detyrë punonjës i Patrullës së Përgjithshme të Komisariatit të Policisë Nr. 1, të dy shtetasit banues në Tiranë.
Këta shtetas dyshohet se duke shpërdoruar detyrën, i kanë marrë me forcë, një shumë parash, shtetasve F. V., dhe F. D., në zonën e liqenit artificial, të cilët kanë depozituar kallëzim në Komisariat.
Pas punës hetimore të kryer është bërë e mundur dhe zbardhja e ngjarjes dhe vënia në pranga e 2 shtetasve të mësipërm.
