Duket se qeveria po mendon rikthimin e basteve online. Sot kryeministri do të nisë konsultimin publik për lotaritë sportive online. Rama sot në orën 10:00 do të organizojë konsultimin publik për lotaritë sportive online. Prezent do të jetë Presidenti i Komitetit Olimpik Shqiptar, Fidel Ylli, i cili ka qenë pro rihapjes, madje ka qenë ndër të parët që ka hedhur për konsultim këtë ide, si edhe përfaqësues edhe Federata Olimpike, Ministria e Financave, Ministria e Arsimit dhe Këshilli i Lartë i Sportit.
Propozimi ka ardhur nga Federata Olimpike Shqiptare për të formalizuar një treg, për të cilin thotë se pas hyrjes në fuqi në 1 Janar të 2019 të ligjit që i ndalonte, ka lulëzuar si treg informal. Sipas propozuesve të kësaj nisme, formalizimi i basteve online do të mund t’i kanalizonte taksat e këtyre sipërmarrjeve për investime në sport.
