Vëllai i moderatores Alketa Vejsiu është liruar sot nga burgu, pasi u kap me katër mina me telekomandë dhe 3 kg lëndë narkotike më 30 shtator 2018.
Gjykata e Lezhës ka liruar nga qelia e burgut me shërbim prove, Endrit Vejsiun, vëllain e moderatores Alketa Vejsiu. Ai u arrestua 1 vit më parë me 4 mina me telekomandë dhe 3 kg lëndë narkotike.
29-vjeçari u shpall fajtor, dhe u dënua fillimisht me 10 vite burg, për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe municionit”.
Vetë i pandehuri ka pranuar akuzat e ngritura ndaj tij, dhe ka kërkuar gjykim të shkurtuar, kërkesë e cila është pranuar nga Gjykata, duke e dënuar atë përfundimisht me 4 vite burg.
Por në aplikim të nenit 59 të Kodit Penal, u urdhërua pezullimi i ekzekutimit të pjesës së dënimit të mbetur pa vuajtur, duke e vënë në provë të pandehurin, për një periudhe kohe prej 5 (pesë) vitesh. Me kusht që gjatë kësaj kohe, duke filluar nga dita e nesërme e shpalljes së këtij vendimi, i pandehuri të mos kryejë asnjë vepër tjetër penale, si dhe të mbajë kontakte me Zyrën e Shërbimit të Provës në Tiranë.
