Nënkryetari i LSI-së, Luan Rama ka dalë në një konferencë për shtyp para pak minutash. Së bashku me Ramën, ishte edhe Elez Gjoza, i cili u kallëzua sot në Prokurori, pasi akuzohet se premtoi vende pune në këmbim të votës për LSI-në.
Administratori i Njësisë Bashkiake numër 2 në Tiranë, gjatë fjalës së tij, i cilësoi këto akuza qesharake, si dhe i dha një mesazh ish-ministrit të Brendshëm, Saimir Tahiri:
“Unë nuk kam tagrin ligjor për punësime në këmbim të votës. Edhe sekretaren e emëron kryetari i bashkisë. Edhe akuza e tretë për pjesëmarrje në fushatë është qesharake. Unë nuk bëj fushatë deri në orën 4 se jam në shërbim të qytetarëve, por pas kësaj orë do bëj fushatë.
I them ish-ministrit të hashashit ta lërë presionin, nuk më tremb dot.”
Gjithashtu, Gjoza ngriti një padi për kallëzim të rreme, si dhe ftoi ministrin e Brendshëm, Demiraj që të ndërhyjë dhe të mos lërë askënd të abuzojë.
