Një dëshmi rrënqethëse vjen nga një i mbijetuar i tërmetit tronditës në Turqi.
Zeki Soysal, banor i qytetit në Izmir, tha se ishte hedhur nga banesa e tij pak para se të shembej.
“U hodha jashtë në sekondën e fundit, e më pas pallati ra. Ishte një grua e moshuar në godinë, por e shpëtuam, arriti të dilte. Në godinën ngjitur me timen vazhdojnë përpjekjet për të nxjerrë njerëzit jashtë”, tha ai për CNN Turk.
Ndërkohë, Presidenti turk, Rexhep Taip Erdogan shkroi në rrjetin social, Twitter “Shërim të shpejtë Izmir”, ndërsa premtoi ndihmë të menjëhershme për personat e prekur.
Tërmeti i fuqishëm me magnitudë 6.6 ballë goditi Turqinë mesditën e sotme.
Deri më tani, janë raportuar 4 viktima dhe 120 të plagosur.
Lëkundjet kanë qenë tepër të forta, në një thellësi prej 10 kilometrash dhe janë ndjerë deri në Athinë.
