Edhe pse është një kombëtare e krijuar vitet e fundit dhe mjaft e re në moshë, Kosova ka arritur të bëj bujë shumë shpejt në arenën ndërkombëtare. Me shumë talente në skuadër, trajnerit Bernard Challandes ka arritur të dalë “koka” e grupit dhe ka një shans të artë për të qenë pjesë e Euro 2020. Së fundmi “Dardanëve” u është bashkuar edhe mbrojtësi i talentuar Florent Hadergjonaj.
24-vjeçari që luan për Huddersfieldin në Premier League e ka marrë vendimin e tij dhe do të jetë nën urdhrat e trajnerit Challandes që në grumbullimin e radhës. Hadergjonaj ka qenë pjesë e të gjithë grupmoshave të Zvicrës, madje ka qenë pjesë edhe e ekipit të parë të helvetëve, por ka hequr dorë për Kosovën.
Ylli kosovar është pajisur tashmë me pasaportë dhe pritet vetëm debutimi. Hadergjonaj do të bëjë shumë punë te kjo përfaqësueses, pasi Challandes ka probleme në mbrojtje. Ai e ka dhënë lajmin përmes profilit të tij në “Facebook”.
Njoftimi – “Përshëndetje të dashur miq. Dua që të ju njoftoj se tani sapo kam marrë pasaportën e Kosovës dhe jam gati që të luaj me fanellën më të bukur në botë.
Dëshira ime gjithmonë ka qenë të luaj për vendlindjen time, mirëpo është dashur të vije momenti i duhur. Jam grumbulluar edhe nga Zvicra nga të gjitha grupmoshat deri në ekipin e parë. Nga tani, unë Florent Hadergjonaj jam një Dardan plus për trajnerin Bernard Challandes dhe do të jap gjithmonë maksimumin për Kosovën tonë”, – shkruan ai.
