Themeluesi i platformës së shkëmbimit të kriptovalutave “Thodex”, Faruk Fatih Özer është arrestuar në Elbasan. Ai ishte arratisur nga Turqia dhe shpallur në kërkim ndërkombëtar.
Detaje të reja kanë dalë në dritë sa i takon prangosjes së shtetasit turk Faruk Fatih Özer. Prej kohës që ishte arratisur nga Turqia, Faruk Özer jetonte në vende të ndryshme, ndërsa së fundmi banonte në lagjen “5 maji” në Elbasan.
Raportohet nga burimet ende jo zyrtare se ai është kapur në një nga plazhet e jugut të Shqipërisë, ndërsa ka qenë në shoqërinë e nipit të kreut të FSHF-së, Evaldo Haxhiut.
Po ashtu në pranga ka rënë edhe vetë Evaldo Haxhiu, për shkak se akuzohet se ka ndihmuar personin e shpallur në kërkim ndërkombëtar.
Faruk Fatih Özer u arratis nga Turqia duke mashtruar dhjetra mijëra turq, të cilët kishin investuar paratë e tyre në monedhën virtuale turke “Thodex”, e cila shpalli falimentin.
