Presidenti serb Aleksandar Vučić është akuzuar se ka konsumuar një birrë me kryeministrin e Kosovës, Albin Kurti. Por duket se ky ka qenë një informacion i pasaktë, pasi vetë personi që e përhapi këtë lajm është tërhequr. Presidenti i Partisë së Popullit në Serbi, Vuk Jeremiq ka aluduar se presidenti serb dhe kryeministri i Kosovës Albin Kurti, kanë dalë së bashku në një lokal për të pirë nga një birrë. Por pak orë më vonë ai ka kërkuar falje për informacionin e pasaktë.
“Mbrëmë, dy politikanë prominentë ballkanikë, pas darkës me të dërguarin e BE-së, dolën për nga një birrë në barin Standige Vertretung në Berlin, siç u ka hije dy miqve. Për çfarë kanë folur?”, kishte shkruar në Twitter Jeremiq.
Pak orë më pas, ai kërkoi falje. “Duket se nuk kam pranuar informatat e sakta dhe për këtë gjë kërkoj falje”, shkroi Jeremiq.
Kjo akuzë nga Jeremiq, ka nxitur edhe reagimin e presidentit serb Aleksandar Vučić, i cili i mohoi këto pretendime. Ai tha se pas takimeve në Berlin, bashkë me pjesëtarë të delegacionit serb dhe vajzën e tij Milica, kanë shkuar në një restorant në Berlin.
“Vajza ime Milica ishte me mua për darkë dhe nëse Kurti ishte njëri prej tyre, atëherë s’di çfarë të them. Dua ta them edhe një gjë. Kurrë në jetë s’ia kam shtrënguar dorën Kurtit. Takimi me Kurtin ishte… më mirë të mos e komentoj sepse s’do të ishte e drejtë”, ka thënë Aleksandar Vučić.
