Gjykata e Apelit ka vendosur që të lirojë Gjergj Cukalin, i cili u arrestua në muajin mars të këtij viti, psi dyshohej si vrasës me pagesë i ish-policit, Arben Bilali. Sipas Top Channel, Cukali qëndroi në paraburgim, ndërsa pas vendimit, rifitoi lirinë në heshtje të plotë.
Në momentin kur u ndalua nga policia, prokuroria deklaroi se ishin gjetur prova shkencore dhe ADN në mjetin ku u krye ekspertiza. Ndërkohë, Gjykata e Tiranës i kishte lënë të dyshuarin në masën ‘arrest me burg’ për akuzën e vrasjes me paramendim.
Nga ana tjetër, Gjykata e Apelit nuk i ka konsideruar të mjaftueshme dhe ka dhënë masën e ‘detyrimit me paraqitje’.
Arben Bilali u qëllua me tre plumba në zonën e Selitës në kryeqytet. Atij i kishin vrarë më herët edhe dy vëllezërit e tij, vrasje të cilat dyshohet se e kanë zanafillën në një konflikt të vjetër me familjen Xhabafti në Tiranë, konflikt i cili ka shkaktuar disa viktima.
Bilali ka qenë punonjës policie te komisariatin nr. 2 në kryeqytet dhe pjesëtar i Forcave të Ndërhyrjes së Shpejtë (FNSH), detyrë nga e cila është larguar disa vite më parë.
Cukali nuk është një personazh i panjohur për Policinë e kryeqytetit. Më 24 nëntor 2006, Gjykata e Krimeve të Rënda e dënoi Gjergji Cukalin me akuzën e pengmarrjes ndaj shtetasit Fajton Demirlika në vitin 2004.
